WORKSHOPS
In ‘t dageliks laeve stuit Laura es lieërares Duits veur de klas. ‘t Vèntj niks zoa sjoan es luuj enthousias te make veur taal, ze te helpe ‘n nuuj taal te lieëre en same mit taal creatief bezig te zeen. Laura kömp den ouch gaer bie uch veurbie óm ‘ne workshop dichte te verzörge. ‘t Dreug den ieës ‘n aantal gedichte oet eige werk veur en hulp vervolges de deilnummers óm zelf ‘n gedich te sjrieve.
ÓNGERWIES
Werks se in ‘t óngerwies en wils se gaer ‘ne kieër get extra aandach aan de Limburgse taal bestaeje, beveurbeeldj in ‘t kader van de Poëziewaek in jannewarie of de Nationale Bokewaek in mieërt? Speciaal veur in de klas óntwikkelde Laura ‘ne workshop veur ein à twieë lesoere.
In deze workshop maken de lieërlinge kènnis mit de gedichskes van Laura, dènke ze nao äöver waat hun modertaal is en waat die veur hun beteikent én laeze ze ‘n aantal gedichskes van Laura, die thematisch bie hunne laefwaereld en laeftiedsgroep passe. Vervolges waere ze aangespaord óm ouch zelf inne pen te kroep en ‘n gedich te sjrieve. En wae durf, moog ‘t d’r nao natuurlik ouch aan de klas veurdrage! De workshop lieënt zich zoawaol veur ‘t middelbaar óngerwies es veur lieërlinge oet de hogere klasse van de basissjoal.
Gedich geïnspireerd door twieë lieërlinge van basissjoal de BRON, ó.a. geïnspireerd door de gedichskes van Laura ónger leijing van meister Pim Lebens.
STICHTING SPECIAL ARTS EN HET ANDERE GEDICHT
In november 2022 waerdje Laura benaderd óm in Limburg aandach te vraoge veur de stichting Special Arts. Dees zit zich d’r via versjillende projecte veur in óm alle luuj te helpe zich te ute en in ‘t bezunjer luuj mit ‘n verstandelike beperking of neet aangebaore herseletsel. Via de poeziëwedstrijd ‘Het andere gedicht’ stimulere ze luuj zich op ‘n creatieve maneer via taal te ute óm vervolges van de sjoonste gedichte ‘ne dichbunjel oet te brènge dae door hieël ‘t landj te koup is.
In mieërt 2023 goof Laura ‘ne workshop dichten in de bieb in Tegele, dae gehieël door luuj mit ‘n verstandelike beperking gerundj wurdj. ‘t Waerde ‘ne ónvergaetelik sjoane en gezellige middig, wo-in ederein ‘t vaerdig kreeg óm ‘n gedich te sjrieve. En d’r nao woor ederein ouch nog zoa dapper óm dit gedich veur te drage!
Veur mieë informatie euver dees bezunjer stichting kènt ger kieke op www.specialarts.nl en op www.gedichtenlaboratorium.nl vènjt ger mieë informatie euver de poëziewedstrijd.
Impressie van de workshop ‘Ederein kan dichte, doe ouch!’ op 1 miërt in de bieb in Tegele.
