Laura Theunissen (*1986) is ‘n Slekkermaedje, gebaore en getaoge in de gemèndje Ech-Zöstere en inmiddels woonechtig in Mestreech. Van kleins aaf aan interesseert ‘t zich veur taal, want “taal verbèntj, bruk moere aaf” en “is ‘n stökske identiteit”.
Es docente Duits motiveert ‘t vol enthousiasme häör internationale studente óm ‘n nuuj taal te lieëre en es sjriefster én spraekster lieët Laura in ‘t Limburgs (mit name Echs) van zich huuere: ” ‘t Limburgs is veur mich mien modertaal: de taal wo-in ich dènk, druim en leefhöb”.
Laura’s gedichskes zeen kort, maar krachtig en gaon euver thema’s wie de leefde, vrunjsjap, durve druime en ouch ‘n stökske zelfzörg, aafsjied en ‘t laeve ‘an sich’. “Mien gedichskes zeen veur ederein, neet te lank of ingewikkeld geformuleerd, maar gewuuen veur de voes eweg.”
Mit häör gedichskes bieëjt Laura häör laezers ‘n stökske truues of (h)erkènning, maar ouch haop, nuuj (zelf-)vertroewe of ‘ne glimlach. En det allemaol ónger ‘t motto:
Van mich veur dich
